Friday, September 28, 2007

الفتنه في بلاد العجايب

طبعا بعد ما اتعرفنا على الهيئة ولذة الحياة واجب عليا احكي ولو موقف فعلي يخلينى مخنوق الخنقة دى كلها – وبما انى مش ناوى اطول اكتر من كدة فى الموضوع دة – لان فى ناس حذرتنى من الخوض فى الحوارات دى – فأنا هاحكي اول تصادم فعلي بينى وبين الهيئة – لانى تقريبا قعدت سنة وشوية - بسمع حكاوى عنهم وبشوفهم فى الشارع وقت الصلاة وبس – انما اول احتكاك بينى وبينهم دايركت كان بعد سنة وكام شهر من وجودى بالرياض

.


القصة اية بقى

انا وصحبي وحبيبي فى الغربة وهانخلي الكود بتاعة حجازى – دايما متعودين نلفلف فى الشوارع – لان بصراحة والحق يتقال البلد هنا فيها شبكة طرق جميلة مش زى عندنا دغدغة وبلاعااات وبلاوى زرقة – كلة دة ما اخذتش بالى منة غير لما نزلت مصر الاجازة اللى فاتت – زعلت قوى على حال الطرق عندنا
المهم مش عاوز اخرج عن الموضوع – واحنا بنلفلف جالنا تليفون من حبيبنا الانتيخ اللى لسة واصل مابقلهوش اسبوعين وبيشكي انة مخنوق من البلد وان ما فيش حاجة تتعمل – وبيسألنا بتعجب شديد انتوا عايشين هنا ازاى !!!؟ - المهم الضحكة المعتادة مننا وقولنالة اجهز انت بس وهانفوت نخدك ونتصرمح شوية – ما كدبناش خبر ورحنا جبناه وحبينا نعرفة الاماكن اللى بنروحها ومن ضمن الاماكن دى حديقة فى حى السليمانية جامدة فشح بنحب دايما نروحها – تمام كدة ؟ - تمام يا ريس


جبنا العشاء وقولنا نروح نضربه هناك فى الحديقة اياها على ما باقي اصحبنا يقبولنا فى الكافى تيم ودى برضة من الكافيهاااات الجامدة هنا بس يا اخوانا – ويدو الحوار كالتالى

الشاب الجديد – قشطة جدا يا ابنى الحديقة دى جامدة وفيها ناس اهو الحمد الله

انا وحجازى – امال اية يا ماااان دى خلاصة الصرمحه
الشاب الجديد – طب اية انا شايف عوائل وحريم وكدة – اية ظروف الهيئة

انا وحجازى – يا بنى بنقولك انسي – دى الخلاصة – الهيئة ما بتعتبهاش

وطبعا حكاية الهيئة ما بتعتبهاش دة حقيقى – لانى من ساعة ما جيت البلد بكام شهر وانا بروح الحديقة دى وفعلا ما فى هيئة بتيجى

الشاب الجديد – لوووووووووووووووز – وازاى يابنى الهيئة ما بتجيش هنا – دى مليانة

انا وحجازى – يا عم اطفح وانت ساكت – قولنالك دى الخلااااااصة – انت ما بتفهمش


وفتحنا الاكل وضربناه فى السريع ومعاة بقى الحاجة الساقعة مع السيجارة الدافى دوف الشديدة – والدماغ عاليا طحن وبنسترجع ايامنا فى مصر وهاتك يا حكاوى
شوية كدة وانا ماسك الموبايل وببلتث اتخيلت بواحد جاى من بعيد كدة ومربي ذقنة ومعاة شوية ورق فى ايدة وشكلة كدة شحات وماسك ورق العلاج بتاعة وهيعمل الحبتين علينا – قمت منفض وضارب عينى تانى على الموبايل وكملت اللى بهببة – ببلتث يعنى
واذا بالراجل دة يقرب مننا طحن وانا بقى مستنى منة يرغي فى حوار العلاج و الادوية وابصر اية وما ادرى ايش – اذا بية يفاجئنى بسؤال تانى ويقولنا ممكن الاقاماااات بتعتكوا لو سمحت – اوباااااااااااااااااااااااااا
طبعا رفعت راسي على طول ونفضت للبلتثة وتنحتلة كدة ( وش مبرق ) – واذا بعسكرى واقف خلفة – قشطة جدا – فى عقل بالى – وانا اللى فاكرك شحات
طبعا الشباب تنحوا ( وشوش مبرقة ) – وانا دققت فى ايدة لقيت انة ماسك اقامات ناس تانية – وانا اللى كنت فاكرها اوارق العلاج – ههههههه
عادى جدا – بعد ما فوقنا من الصدمة طلعنا اقامتنا والراجل اتاكد اننا فى السليم – وساعتها دار الحوار دة
المطوع – وين العائلة حقكم ؟
انا – مش معانا عوائل – احنا كنا قاعدين نتعشي لوحدينا
المطوع - ممممم
طب ليش كدة – انتو ما عارفين ان المكان دة للعوائل
انا – لا والله ما عندناش فكرة – بس عادى يعنى – احنا قاعدين فى حالنا
المطوع – عادى !!! حالنا !!! - طب قوم معايا انت وهو
حجازى – طب هو فية اية بس – احنا كدة كدة كنا قايمين – لان احنا اساسا مستنين ناس اصحابنا وهانطلع على الكافى تايم – وبيكلمة وهو عاوج بؤه وبأسلوب فية من الفرفرة حبتين
اه – نسيت اوضح انا حجازى ضارب شعرة جل ونازل بالبنطكور – وعايش اللحظة حبيتين
انا بقي بس فى عقل بالي - الله يخرب بيتك يا حجازى – هو ناقص توصية – دا احنا كدة بقينا قدامة شباب منحل – مقضينا حدائق وكافيهات بدل ما نروح نعتكف فى الجوامع وندعي على اللى كان السبب فى مجينا البلد دى
ربنا يستر بقى

المطوع – كافى تايم !!!! – طب قم قم انت وهو وسابنا ومشي ومعاة الاقامات بتعتنا
.
طبعا بقى ما قولكوش منظر 3 شحوتة واحد منهم بالبنطكور وهما قايمين قدام الحديقة كلها وماشين ورااا الافندى دة – تقريبا كان نفسي الارض تنشق وتبلعنى – ويا ترا مين من الناس الكتير اللى حواليا دى اللى كنت بكلمها بالبلوتوث ومنظرى اية دلوقتى – دا انت كنت خلاص هاخد رقم التليفون
الله يخرب بيتك يا حجازى انت واللى فى بالى – ضيعتوا البوونيه من ايدى
وهوباااا يقابلنا على باب الحديقة الامير بتعهم – الامانة لله كان وشة بشوش مش زى اللى الافندى اللى سحبنا وراة
واجتمع بينا كلنا احنا وغيرنا طبعا من الشباب اللى ممسوك – ويا ابنائي لية ترموا نفسكوا فى المفاتن – وحاولوا بقدر المستطاع تبعدوا عن الاماكن اللى فيها تجمعات زى دى – عشان الفتنة – وادينى ادينى من الكلام – حسيت ان احنا غلطنا ودخلنا كابرية الليل – مش مجرد حديقة عامة فيها معظم الحريم منقب والباقى يعينى صايع وكاشف
وشة – هى دى الفتنة !!! – عجبي – يجوا يشوفوا شارع الهرم عندنا
المهم بقى اصلا انا مش مركز هو بيقولنا اية – ودة بسبب الموبايل اللى انا شايلة – لانى لمحت فى ايد اللى ما يتسماش شوية موبيلات مقبوض عليها بتاعة الشباب التانين – وانا كنت ساعتها حاطط نغمة الجهاز للسيدة الفاضلة اليسا – فاتت سنين وانا بسمعك – لعمري فكرت ارزعق
طبعا اخوكوا فى الله واقف على اعصابة خايف التليفون يرن قبل ما المحاضرة دى تنتهى – وياخد بالة اللى ما يتسماش من الحاجة اليسا وينتبة انة ما شيكش على تليفوناتنا – لان لو كان احتك معايا فى الموضوع دة – ما كنش هايحصل طيب – لانة فية صور وفيديوهات شخصية – ولو تربست معاه – هتقفل معايا وهيبقى الصدام جامد – ويمكن يكون فيها خناقة واللى يحصل يحصل – ولو توصل للترحيل – عليا وعلى اعدائي
المهم - اخوكوم لسة واقف مش مركز فى اى كلام ولا اى حاجة – كل اللى شاغل بالة حاجتين – رنة الموبايل ومنظرى قدام الموزة اللى كنت بكلمها- هههههه
اة ة ة – اووووف – يارب نخلص


والحمد الله خلصت الجلسة اللى كانت على باب الحديقة – عشان اللى ما شفش من جوة الحديقة يشوف من برة – فضيحة بجلاجل يعنى
ينهى كلامة امير الجماعة بانة خلاص مش عاوز يشوفنا فى الحديقة دى تانى وانة خلاص عرف اشكالنا – على اساس انة بيكلم عيال صغيرة – حفظ اية ولا اية بس
واستودعكم الله يا اولادى ويلا بقى كل واحد يروح واعطيهم اقاماتهم يا ......................
ولا بلاش
طبعا اخدنا اقامتنا من هنا وخرجنا برة الجنينة وشنا احمر واصفر وجايب الوان الطيف – وانا أقول للشاب الجديد – نبرت يا ابن الفقرية – اول مرة اشوف هيئة تيجي هنا – وانت معايا يا فقر – انت من طريق يا ابن الحلال وانا من طريق – طبعا وهسترية ضحك مسكتنا كلنا لغاية ما دمعنا من زهول الموقف واللى بيحصل دة بجد ولا تهريج – ولا دى الكاميرا الخفية – ولا طاش ماطاش – ولا اية بالظبط
وانا عمال اضحك على منظرى وزمان الموزة كدة فطسانة على نفسها من الضحك عليا – والضحك والهرتلة اللى حصلت دى فضلت معانا حبة كتير – دا حتى احنا مشينا ونسينا ان احنا معانا السيارة واقفة قدام الحديقة
ودى كانت نهاية مرواحى للحديقة

.
بس عاوزين الحقيقة – انا ساعات بيأخدنى الشوق واجازف واروحها برضة – هههههههه
.
كل اللى عاوز افهمة – فتنة اية اللى هانتفتنها من شوية عبيان سودا ومنقبات ومحجبات – واللى منحلة بقى قوى – مبينة شوية من شعرها
فين الفتنة !!!؟ – قولولى انتوا – يمكن انا مش واخد بالى

.

وفى بلاوى تانية والله – بس انا مش عاوز اخرب الدنيا قوى – وانتوا عارفين اصلا انا ما بحبش الرغى
حتى شوفوا البوست صغير اد اية
صدى الصمت بقى



هههههه

.
والسلام عليكم - وربنا ما يوقعكوا فى هيئة




Tuesday, September 25, 2007

منطقة محظورة


على فكرة ده أول بوست أرغي فية – فسمحونى بقى لو طولت عليكوا
انا هرغي معاكوا فى موضوع خانقنى قوى وهو موضوع هيئة الامر بالمعروف والنهى عن المنكر
.
شوفوا بقى
.
حد فيكم سمع عن المطوعين - اوبلاش دى
حد فيكوا سمع عن هيئة الامر بالمعروف والنهي عن المنكر
اكيد فى ناس سمعت - وبرضة فى ناس كتير ما عندهاش فكرة واللى مش عندة فكرة بقى انا هاديلوا فكرة - بس صغنطوطة قوى
.
هيئة الامر بالمعروف والنهى عن المنكر ودى طبعا مطبقة فى المملكة العربية السعودية اطال الله عمرها وكتر من بترولها وهى عبارة عن مجموعة من المطوعين مصرح ليهم من قبل الملك بأنهم يطبقوا السنة ويأمروا بالمعرووووف وينهوا عن المنكر ودة باين جدا من الاسم
مطوع = رجل ذو لحية طويلة = شيخ يعنى
المهم
نحكي بقى شوية عن سلطاتهم
من سلطاتهم بقى يا جماعة انهم يمنعوا الشباب العوذاااااب يعنى اللي مش معاهم حريم من دخول ألاماكن العامة على اساس انهم مش بنى ادمين – الدخول كابيل يعنى - وكمان هما اللى بيحرصوا الشوارع من الفسق والعدوان – جامدة العدوان دى - هههههه – أساسا البلد ما فيهاش جيش – بس فيها قاعدة أمريكية والحمد الله – ربنا يخليلنا أمريكا
يعنى اى شاب شايف نفسة ولا حاجة وحابب يعمل فيها فونت يظبطوة - بالرغم والله ان الشباب مظلوم
وكمان اى حرمة تمشي فى الشارع من غير حجاب او نقاب يكلموها ويدوها من المنقى خيار واتحشمي يا حرمة وكدة - على اساس انها ماشية ببدلة رقص - واللطيف بقى انهم كانوا زمان مش بيكتفوا بالكلام مع الحريم لا - ابسلوتلى - دة كانوا معاهم خرزانة وكانوا بيضربوا الحريم على ...... - اه والله - ابويا بيقولى كدة - اصلة هنا من زمان - هههههههه
وكلة دة عشان مش تبين وشها فى الشارع – قال يعنى هانتفتن من الجمال البدوي - بس اليومين دول عقلوا وبقوا مودرن - بيكتفوا بالخيار قصدى بالكلام بسبب المشاكل اللى حصلت زماان
والحاجة الوحيدة بقى اللى انا شايفها صح - بس هما بيطبقوها غلط هى انهم وقت الصلاة يلفلفوا فى الشوارع ويخلوا المحلات تقفل عشان الناس تصلي - ويا ويلة اللى ماشي ساعة الصلاة - يخدوة على طول ويخلوة يصلي بالاجبار من وقت الصلاة اللى اتمسك فيها الى الصلاة اللى بعدها ويمضوة على تعهد انة ما يعملش كدة تانى وبعدين يطلقوا صراحة - وساعات برضة ودى حصلت مرة معايا - انهم يدخلو الاماكن العامة او اماكن الاكل وكدة - ويتحققوا من شخصية الحريم اللى انت قاعد معاهم - يعنى لازم تكون قاعد مع عائلتك - غير كدة ما ياكولش معاهم - ومعنى عائلتك هنا مش بنت عمك ولا بنت خالك - لا - اوعى - اخرك امك او اختك - غير كدة نووووو
وكان الهدف من الموضوع دة انهم يقفشوا الناس الوحشين اللى بيظبطوا الحريم بالبلوتوث وما اداراك ما الذى يحدث بالبلوتوث فى بلد فيها الحرمان الاوسرى والعاطفى دة
المهم - ما ظبطوش حد مخالف - والحمد الله ان اللى كانوا قاعدين معايا امى وابويا - يعنى مالوش حاجة عندنا - بس اهى حركة جديدة منهم – للاثارة والتشويق والحبشتكنات
بس برضة مش معنى كدة ان البلد فوق مستوى الشبهات ومفيهاش غلط - نسيت اوضحلكوا ان كمية الصحراء هنا كتيرة فشخ والشباب بيحب يطلع البر يعنى الصحراء كتير - ويا سلام بقى على جو الصحراء - على راى عادل امام - بس خالى بالك من الجمااااال واوعى الكورباج - ههههههههههههههه
واللى ما لوش فى الصحراء اكيد لة فى الاستراحات - ودى عبارة عن مكان مغلق وداخلة حمام سباحة ومكان لذيذ بعيد عن البلد – اعمل فية اللي يحلا لك - الناس بتحب تأجر استراحات وتقضى يوم برة البلد وكدة – فى اللذيذ يعنى – وأنا بحب اعمل كدة ساعات – بس والله مش بيبقى معايا حريم غريب - ههههههه
المهم بقى عشان ما طولش عليكوا - قولوا طول
انا برغي لية فى موضوع الهيئة دة
بصراحة انا اتخنقت منهم - ومن اللى بيعملوة - رغم ان الهدف من وجودهم سامى وجميل - بس العيب هو ان اللى بينفذة بشر - وطبعا كلنا عارفين يعنى اية بشر – ومش اى بشر – دة بشر بغطرة وعقااااال

انا مع الفكرة والله - ما اجملها - بس بجد القائمين عليها كرهونا فيهم وفيها - لان لو سيدنا محمد نفسة موجود مش هيعامل الناس كدة - فلية هما يعيشوا الدور جامد كدة ويكرهوا الناس فيهم - وتقريبا بيخلوا الناس تعند - واللى بيصلي يتعمد ما يصليش لو شافهم واللى واللى - كمية تدخلات فى حياتك يمنعها اى دين - وكمان تمنعها حقوق الانسان
جميل انك تنبة الناس وتحسهم على دينهم بس بالحسنى مش بالعصا - لان احنا اساسا مش كفار ويمكن فى كتير قوى ايمانهم اقوى من ايمان المطوعين – بس نقول اية بقى
اكيد هانقول – سم طال عمرك
وبس
حبيت اشارك معاكم موعاناة من نوع جديد ومحظور علينا نتكلم - لية ؟ - عشان دول بيأمرو بالمعروف وينهوا عن المنكر - وما خفى كان اعظم - ولكن كفاية كدة - عشان انا لسة هنا- وربنا يستر بقى

اخيرا
وبعد ما عرفت الناس اللى ماتعرفش ولا تسمعش عن الهيئة هاحاول احكيلكم فى البوست الجديد عن مواقف حصلتلي معاهم - بس مش عاوزين ضحك - دة لو ربنا ستر وسابونى اكمل واعبر بـ حرية
لان ما تنسوش ان احنا فى مجتمع عربي او بالاحري احنا دول عالم ثالث - ما نعرف شي عن الحرية
وبس خلص الكلام

ادعولي بالرحمة
ومع السلام عليكم

Thursday, September 13, 2007

Nice Message


اللي يصوم الشهر بطوله - شو بنقوله

شاطر شاطر

اللي يخلص كل فطوره - شو بنقوله

شاطر شاطر

اللي يأدي كل فروضه واللي يقوم الليل بطوله - شو هانقوله

شـاااااااااااااطـر شـااااااااااااااااااطـر
.



كل سنة وانتوا طيبين ويارب كلنا نطلع شوطااااااار - ونتعتق من النااااار

اللهم ارزقنا حبك ورضاك عنا واعتقنا من النار

اللهم امين

Tuesday, September 11, 2007

اختلاف الثقافات في دايرة الرحلات

Cultural diversity



K.S.A





















U.S.A





Hmm USA or KSA? Which do you prefer ?



KSA - Kingdom of Saudi Arabia

OR

USA - United States of America